పిల్లల లోని సృజనాత్మకతను వెలికి తీయాలని, ఇందుకోసం తల్లిదండ్రులు వారికి స్వేచ్ఛ ఇవ్వాలని చిల్డ్రన్ ఎడ్యుకేషన్ ట్రస్ట్ చైర్మన్, బాల చెలిమి పిల్లల పత్రిక సంపాదకుడు వేదకుమార్ అన్నారు. సిరిసిల్లా మండ‌లం లోని రంగినేని సుజాత మోహ‌న‌రావు ఎడ్యుకేషనల్ చారిటబుల్ ట్రస్ట్ లొ రెండు రోజుల పాటు పిల్ల‌ల పండుగ పేరిట జరిగిన సృజ‌నాత్మ‌క ర‌చ‌నా కార్య‌శాల ఆదివారం ముగిసింది. కాళోజీ జయంతి సందర్భంగా ముందుగా పుష్పాంజలి కార్యక్రమాన్ని చేపట్టారు. ఈ సందర్భంగా ఏర్పాటు చేసిన సభకు ముఖ్య అతిథిగా వేదకుమార్ హాజరై మాట్లాడారు. పిల్లల పండుగ పేరిట జిల్లాలోని బడిపిల్లల కోసం రచన కార్యశాల ఏర్పాటు చేయడం అభినందనీయమని కొనియాడారు. పిల్లలకు తల్లిదండ్రులు స్వేచ్ఛ ఇస్తేనే వారిలోని సృజనాత్మకత వెలికి వస్తుందని అన్నారు. 

బాలల ఊహాశక్తిని పెంపొందింపజేసే రచనలు రచయితల నుండి రావాలని తెలంగాణ సాహిత్య అకాడమీ చైర్మన్‌ డా. నందిని సిధారెడ్డి అన్నారు. బాలసాహిత్యం ముందడుగు అనే అంశంపై బాలచెలిమి పిల్లల వికాస పత్రిక, చిల్డ్రన్స్‌ ఎడ్యుకేషన్‌ అకాడమీ సంయుక్త ఆధ్వర్యంలో శనివారం ఆక్స్‌ఫర్డ్‌ గ్రామర్‌ స్కూల్లో నిర్వహించిన 'బాలచెలిమి ముచ్చట్లు' 6వ కార్యక్రమానికి ఆయన ముఖ్య అతిథిగా హాజరై మాట్లాడారు. సాంకేతిక పరికరాలు పిల్లల ఊహాశక్తిని, కల్పనా సామర్థ్యాన్ని దెబ్బతీస్తున్న ప్రస్తుత తరుణంలో బాలల రచయితలు పిల్లల్లో అభిరుచుని పెంచి ఆసక్తి వైపు నడిపించే రచనలను విరివిగా చేయాలని ఆయన సూచించారు. బాలల హృదయాలకు హత్తుకునే విధంగా సన్నిహితమైన అంశాలను ఎన్నుకొని అందులోంచి ఊహాశక్తిని రచయితలు రాబట్టగలగాలని చెప్పారు. సాంకేతికతవైపు వేగంగా ప్రపంచం పరుగులు పెడుతుంతే బాలల్ని కథలు, పాటలు వంటి వాటివైపు నడిపించాలని ధ్యేయం రచయితలల్లో పెరగాలని అన్నారు. రచయితలు భాషను బాలల కోసం మార్చుకోవాలని చెప్పారు. సరళతరమైన బాషలోనే పిల్లలకు మానసిక పర్యావరణాన్ని కల్పించవచ్చని అన్నారు. భావనా శక్తి తగ్గిపోకుండా భాషను నైపుణ్యంతో బాల సాహిత్యంలో ప్రయోగించాలని చెప్పారు. బాలల రచనలు చదివే పిల్లలకుఊహను పెంపొందించుకునే వాతావరణం కల్పించగల్గితే లక్ష్యం నెరవేరుతుందని తెలిపారు.